भला जागिया भाग झुझाळा जूना देव कहाया जी
अलख निरंजन देव गुसाई जग में आपरी माया जी।
आसोजा री बीज चानणी , मेळो भरीजे भारी जी
एकम वाळी रात बाबजी जमो जगावो थारो जी
सरवरिया री पाळ बैठके सगळा मळ-मळ नहाया जी
अलख निरंजन देव गुसाई जग में आपरी माया जी।
गांव झूझाळा बण्यो सोणो जी जग में नांव पूजायो जी
भगता रा भाग जगावण ने अलख पांव धराया जी
एक पांव री पूजा होवे आई आपरी माया जी
अलख निरंजन देव गुसाई जग में आपरी माया जी।
राजा बलि बलवान जगत में निनाणू यग करिया जी
दो पग में सरस्टी ने नापी तीजो सीस पर धरिया जी
अनगड़ देव मोटा नाही घड़ण में आया जी
अलख निरंजन देव गुसाई जग में आपरी माया जी।
टाबर हूँ अणजांण बाबजी थे ही राह दिखावो जी
भोळो भगत जांण के बाबा बौली थे बुलवावो जी
दास दलीप की बोली थारा ही गुण गाया जी
अलख निरंजन देव गुसाई जग में आपरी माया जी।