टिकट कटायो पाली रो बो जा पहुचियो अजमेर, बालम नखरालो।
फोन लगायो जैपर घंटी बाजी जैसलमेर 
बालम नखरालो।
हांरे बालम नखरालो , घूमियायो बीकानेर
बालम नखरालो।
देऊं ओलबो छेलो म्हांनें बातां सुं बिलमावे।
केऊं टीकी लियावणं रो रबड की टूंटी ल्यावे।
पाव मंगाऊं पालको लियावे ढाई सेर,
बालम नखरालो ।
हांरे बालम नखरालो , घूमियायो बीकानेर
बालम नखरालो ।
जीमणं नें बैठे तो छेलो नखरा घणां दिखावे।
पतला फलका साग सांतरा पापड च्यार तलावे।
खाटी लागे राबडी इनें काचा लागे केर,
बालम नखरालो।
हांरे बालम नखरालो,घूमियायो बीकानेर
बालम नखरालो।
गलियां मांही फिरे डोलतो रात पड़िया घर आवे।
सोवे नीं सोबादे म्हांनें सारी रात जगावे।
मन री बात सुणाऊं तो सो ज्यावे मुंडो फेर,
बालम नखरालो ।
हांरे बालम नखरालो, घूमियायो बीकानेर,
बालम नखरालो।
कपडा पेरे ऊजला होंडा पर चढकर जावे।
साथीडां रे सागे छेलो फिलम देखकर आवे।
गुटका खावे फिरे थूकतो घर में च्यारूंमेर,
बालम नखरालो,
हांरे बालम नखरालो, घूमियायो बीकानेर,
बालम नखरालो।
टिकट कटायो पाली रो बो जा पहुंचियो अजमेर, बालम नखरालो।
फोन लगायो जैपर घंटी बाजी जैसलमेर,
बालम नखरालो।
हांरे बालम नखरालो ,घूमियायो बीकानेर
बालम नखरालो।