एकर एक गोव रे माई एक मिनख एक बोणिये रे घरे गियो हो। उठे जा’न स़ेठोणी जी ने हेलो करियो के पोणी पावो तो। स़ेठोणी  जी बारे आई पौणी रो लोटो लेन आ’न पुछियो के कठैऊ आया हो हो अन काई जात है थोरी। मिनख केयो के सरगरा हो मेतो। स़ेठोणी जी केयो के थे सरगरा हो काई भगोन रे घरू आयो हो। मिनख ने ठा पड़ गियो के स़ठौणी जी भोळा इज है। जणौ केयो के हो भगोन रे घरु आयो हूँ। स़ठोणी जी बोळ्या के मोरे ई हमार नणद बाई चलगिया हाँ। बे थोने मिळिया हाँ के को मिळिया हाँ नी। जणौ मिनख केयो के मिळिया तो हाँ पण उओरे कपड़े लते री अन खावण पीवण री कमी घणी है जको तंग घणा रेवे है अन फाटोड़ा गाबा पेरे है अन मने केयो हो के जावो जणो म्हारे भोजाई ने केजो जको बे जीव रा घणा स़करा है अन उओने केजो जको बे म्हारे गाबा लता मेले जियो ईण वास्ते में थोरे खन्ने आयो हूँ। स़ठौणी जी आपरे घर रे मौईनू कपड़ा अन खावण पीवण रो स़म्मोन अन रुपिया दूजा उण मिनख ने दे दिया। बो मिनख ले परो अन गियो परो। जेड़े अन स़ेठजी घरे आया अन के स़ठौणी जी दिन आळी बात केयी के आज स़रगरा मिनख आया हाँ जको में तो उओरे स़ाथे बाईजी रे वास्ते कपड़ा अन खावण पीवण रो स़म्मोन मेलियो हो। स़ैठ केयो के केड़ा आया हाँ अन थू स़ैंग सम्मोन दे दियो हो इयो कर अन स़ैठ ऊट लेन उण मिनख रे लारे गिया परा स़म्मोन पाछो लावण वास्ते। मिनख स़ठो ने आवता देखिया अन स़ोचियो के स़ैठ है तो स़ागेई अन हमे स़म्मोन तो पाछो ले जाई। इयो कर परो अन बो एक खेड़ी रे माथे चड गियो। स़ैठ ऊट खेड़ी रे हेटे रोक अन स़ेठजी खेड़ी माथे चड अन ढुका जेड़े बो मिनख ऊट रे माथे कूद परो अन ऊट लेन गियो परो स़ैठ मूंडो उतार अन पाछा घरे आया। स़ैठौणी जी पुछियो के स़रगरा मिळिया हाँ काई थाने। स़ैठ केयो के मिळिया तो हाँ अर केयो के बाईजी रे आवण जावण वास्ते स़ाजन नी है जणो में तो ऊट ई ऊओने देन आयो हूँ।