एक बार एक भोळो मिनक आपरी माँ ने केयो के माँ म्हे म्हारे स़ारे जाऊं हूँ। उने स़ारे रो नोम मिठीयो हो। उनी माँ केयो के बेटा थुं स़ारे तो जाई है पण बेटा थु भोळो घणो है। थु थारे स़ारे रो नोम भुल जाई है, जको रेवण दे। बो केयो के माँ में भुलु कोनी म्हने इयाद रे जाई है। इयो करन बो घरु निकळ्यो। थोड़ी भौ गियो अन के आगे ऊं हिन कुदिया अर के स़ारे रो नोम भुल गियो।  जणे पाछो घरे गियो। माँ ने केयो के माँ थु हमके इयो कर के म्हारे गळे में एक हांडी बांध दे जिके रे माई गुळ री घाट घाल दे जको खाँ बोकरु अर मिठीयो मिठीयो कर बोकरु जके ऊं में नोव भुलु कोनी हूँ। माँ इयो इज करियो। हमे बो खावतो जावे अन करे मिठीयो मिठीयो। इयो करतो करतो स़ारे गियो परो। स़ारे ऊं थोड़ोक आगो रियो अर देखियो के हमे तो ठैठ आ गिया। हांडी खाली करन फेक दो। हांडी में हात घालियो अन के हात हांडी में फस गियो। घणी खपियो पण हात निकळ्यो कोनी। इयो करन घरे गियो। स़ऊजी रोटी करन लाया। पण उणु डावोड़े हात ऊं जिमी जी कोनी। भुखो इज स़ु गियो। आदीक रात में स़ागेड़ी भूख लागी के उठीयो। उठ न लुगाई ने हेला करिया के रोटी लावे कनी। लुगाई रोटी लाई। पण हात में हांडी फसियोड़ी रोटी खाईजे नी। लुगाई केयो के थे जावो भाटे माथे पटक अन हांडी फोड़ दो। बो गियो जा परोन अंधारे में स़ोरो जी रे माथे में जोरु हांडी री ठोकी के हांडी फुटगी। हांडी फुटतो ई बोतो फटाक देणी नान घर में बडग्यो। स़ोरो जी रो माथो स़ागेड़ो हळको कर दियो।