म्हे जाणू हूं

धरती पर बैठो-बैठो म्हें भाखर लिखणीं जाणूं हूं ।
कोतीणां बण ज्यावे ऐड़ा आखर लिखणीं जाणूं हूं ।
मिनकां में मिनक पिछाणूं हूं मिनकां री आदत जाणूं हूं ।
लिफाफा री सकल देख कैड़ो है कागद जाणूं हूं ।
फैसन में फसियोडी नवीं जनरेसन नें जाणूं हूं ।
भीतर री टैंसन बारे री डेकोरेसन नें जाणूं हूं ।
नकली हंसी पिछाणूं हूं आख्यां क्यूं सूजी जाणूं हूं ।
धरती पर पाप कित्तो बढग्यो धरती क्यूं धूजी जाणूं हूं ।
नेता री हकीकत जाणूं हूं पब्लिक री हालत जाणूं हूं ।
बाबाजी बैंगणं खावे है दूजां ने नसीहत जाणूं हूं ।
घर घर की हालत जाणूं हूं घर घर की काणीं जाणूं हूं ।
आजकाल रा मिनकां में कित्तो है पाणीं जाणूं हूं ।
कड़ी-कड़ी नें जोड़-जोड़ जंजीर बणांणीं जाणूं हूं ।
जस रा आखर मांड मांड जागीर बणाणीं जाणूं हूं ।
आंऊं री एक बूंद हूं म्हे पलकां पर टिकणीं जाणूं हूं ।
हंसी-हंसी में दरद रो इतिहास लिखणीं जाणूं हूं ।
स़करी-भूंडी टेम ने म्हें पास करणीं जाणूं हूं ।
भूख नें धारूं कोनीं इकावणा करणीं जाणूं हूं ।
सबदां रा बाण चलाकर के म्हे घायल करणीं जाणूं हूं ।
बिगड्य़ोडी तकदीर नें भी स़ावल करणीं जाणूं हूं ।
इयो तो नरसी मेहता हूं औकात अपणीं जाणूं हूं ।
इयों करताल बजाऊं हूं पणं भात भरणीं जाणूं हूं ।
म्हनें कोई नहीं जाणे है पणं म्हे सगलां नें जाणूं हूं ।
अे करे घात री बात पणं म्हे आंरी जात पिछाणूं हूं ।
संतोष करणीं जाणूं हूं म्हे गम खाणीं भी जाणूं हूं ।
पूरो मिले तो ठीक तिवाडी कम खाणीं भी जाणूं हूं ।